Un Blog avvinato

Zena - Genova

ZENA

in La rubrica della Domenica Autarchica Di

Zena, a vèa Zena, a sajä sempre a Zena di caroggi. Tutto intorno a-a çittæ ordinâ tra Via Vinti, Ciassa De Ferrari e Via Romma ma basta un passo pe scuggiâ int’in mondo parallelo de bellessa servaga. Servaga perché i caroggi son‘n’emossion fixica: i cangiamenti rapidi de luxe e ombra, a tramontann-a che d’inverno a te zèa e osse, l’òudô cädo da-a fugassa che o l’arriva da un forno, a spussa de refrescumme de quarche avanso do mercòu, e voxe da gente o di venditoì.


I euggi no quetan mai int’i caroggi: un recanto degradòu peu arvise int’e ‘na ciassa de ‘na bellessa mai guastâ da-o tempo , un gatto che o rosiggia i avansi de un combo morto
Sotta l’antigo portâ de lavagna con San Zorzo e o Drago ‘na bagascia frusta de tante stagioin a se vende sotta ‘n’edicola do setteçento donde l’immagine da Vergine Maria a l’è in primmo ciàn.
Da ogni parte butteghe e scangi lesti e de poco conto: vegie ferramenta e rivenditoì de jeans, ‘na gescia sconsacrâ che a vende profummi sotta pittue sacre, banchetti con i dischi de Lauzi e De Andrè e i DVD soft porno, butteghe da mersâ vegie de çent’anni con proprietaj vegi vegi donde son ancon accatastæ cöse che no se sa ben chi o l’è chi l’accatte.


Gh’è anche de butteghe de roba da mangiâ, i pesciaieu , e butteghe da maxellâ, i besagnin, i frisciolæ che vendan fugassa tutte streite in recanti piccin, quarchedunn-a antiga comme e muage che e contegnian, atre con arredi affraschæ che che se a tian da antighi int’o seunno de ‘na Zena che a se renoèa tra “restauri” importanti e muggi de rumenta donde meno ti te l’aspëti.
Int’i caroggi no se parla italian ma o dialetto zeneize o a fa da padron: finn-a i neigri, i arabi, i sudamerichæn e tutto un mondo che o no se peu capî de ‘n’immigrassion de longo a-i margine da lezze, che quande no parlan a seu lenguadixan “belin” comme i zeneixi vèi.
Mori inquietanti int’o scuo da neutte, de seguo,anche se no èan gabibbi ma vèi zeneixi i doì sicari che han ammassòu, in Ciassa Banchi int’in freido giorno de frevâ do 1682, Alessandro (Lisciandro) Stradella, fin musicista, poæ do concerto grosso pe a colpa d’aveî sedotto ‘na Lomellini de ligneua.
Int’i caroggi e biscasse de ‘na votta æn sempre ciù ræe, int’e quelle, pê intendise, o pesto de-e trenette o l’æiva ‘na quantitæ de aggio inverdugâ (pin de presumì, ) e sostegnùa e donde se mangiava ancon a sbïra: ‘na suppa de trippe resciòu pê i prixonê de e galee çittadinn-e. 


A-a giornâ d’ancheu van ciuttosto de modda e fainæ “take awai”o i locali notturni gestii da zoeni che, in sciti ciù o meno caratteristici proponn-an a cuxinn-a storica.
O piaxei “gourmet” int’i caroggi o l’è un tocco de fugazza tegnua streita int’e die con e lerfe imbrattæ de euio e gren de sâ e un papê vonto che o t’arresa in man.
I contrasti se nottan ascì giando l’euggio tra i palassi: se ne veddan serie ma sfarsose di-i Spinola, dei Doia e di-i Cattaneo e dappeu se gia o canto e se attrovemmo a rasentâ ‘na porta arrembâ con un letto desfeto usòu pê amoî paghæ a poco prexo.


O fa ascì contrasto passâ da semplici butteghe de leitæ donde se tasta un caffè con un cuggiarin de latton un po’ ciegou da l’uso a-a fin elegansa de un pastissê dell’ottoçento, comme o Klengutti in ciassa Sozzeuggia, che a sberlussega de stucchi e decòi de un tempo che no gh’è ciù .
Int’i caroggi no poemmo perdise, da quarche parte se và de longo a finî : ‘na ciassa, a stradda da Cattedrale San Loenso, a grande stradda di-i paxi nobiliari, Via Garibaldi e o mâ.
O mâ che o purifica da-a penombra di caroggi o se arve e o se scioa int’a maestositæ colorâ do palassio San Zorzo, int’e neuve architettue do porto con e veje e i “dinghi” che montan sciù o vento, int’a confuxon de-e botteghe e di banchetti de Sottoripa e poi int’i baretti donde, zà de primma mattin ghe son avventoi, quelli che intran con o :”belin figgeu” e che spelinsigan fugassa con e çiòule e frisceu de bacalà bagnando o tutto con un gianchin de Cönâ.


Inte sti locali o no manca mai un biliardo e quarche tòua pê giastemâ a fortunn-a de-e carte, un gagliardetto di Grifoin o do Doja e un mondo de e seu stoje quesci de longo tristi e righæ da-o mogogno perché da-i caroggi se và da quarche parte ma no se ne sciorte mai manco quande ti espatri e ti t’asseunni.

Commenta

Gli ultimi da La rubrica della Domenica Autarchica

I Legumi

Nonostante la Monsanto, corazzata multinazionale dell’agrochimica, ora acquistata dalla Bayer, azienda farmaceutica

Bistrot o Bistro?

Sull’origine del termine bistrot gravano non poche incertezze. La parola entra nell’uso dei
Torna Su
Inline
Inline